1. هذا الموقع يستخدم ملفات تعريف الارتباط (الكوكيز ). من خلال الاستمرار في استخدام هذا الموقع، فإنك توافق على استخدامنا لملفات تعريف الارتباط. تعرف على المزيد.
اضف رد
المشاهدات 1,374 | الردود 5 | مشاركة عبر :
  1. Dream-Sat المدير العام
    طاقم الإدارة إدارة المنتدى

    الادارة

    بسم الله الرحمن الرحيم
     

    [​IMG]

    متابعة شيقة لحكايات مكتوبة لعبد العزيز العروي

    :32:


    يا حافر حفرة السوء

    [​IMG]

    مرحباً أيها الزائر , يجب عليك التسجيل أو الدخول لمشاهدة الرابط!






    قال لك اللي يحفر حفرة السوء ما يحفر الا قياسو- يدور الهم و ما يرجع الا لراسو


    يحكيو علي سلطان- كان خايف ربي و يقدر اهل العلم و يعظم رجال الدين صلاي حافظ كلام ربي لكن يشوف في الرعية متاعو موش قايمين بفرايض دينهم و الجوامع فارغه تطمبر ، قعد يخمم كيفاش يعمل معاهم باش يردهم للطريق المستقيم.. قال: من اركان الدين النظافة و الطهر، ها الناس لا يعرفوا لا يغسلوا لا ينظفوا أبدانهم لبريمة فيهم لحموا يتقرقش بالسكينة، هات قبل كل شيء نعلمهم النظافة و النظافة توصل للوضوء للصلاة
    قال نعمل حمام، و الي يجيء يغسل بلاش
    كفن بلا فلوس، كل نفس ذايقة الموت. و الحاكم العاقل كيف يحب يرغب الناس في حاجة يعملهالهم في الأول بلاش
    جاب البناي بني لو حمام هايل، ركبوا البيبان و الشبابك . جاب الدهان شهرين وهو يدهن- عمل الفيليتوات و القرنيزة.. محابس النوار صيد مربوط في نخلة زوز حمامات و بيناتهم خمسة. ركب الكواتروات سيدنا علي و الحسن و الحسين- باسم الله الرحمان الرحيمن فاز من ظفر بالدين- خرج الحمام كيف العروسه
    خرج البراح يدور في البلاد النظافة من الايمان و الغسيل بلاش في حمام السلطان
    و جاب البناي حطو في الحمام و عمل لو شهرية و ولي هاك الحمام بالبعبوص دق بلا حق أشكون الي يلحقلو الطريق و يدخل يعمل طياب. و شيخ قاعد في المحرس يعلم في الناس في الوضوء و الصلاة و هاك البناي عامل لسين يغزل لحرير سيدي سيدي و النهار لكل و هو يجري و يطيح هذا يمدلو البشاكر هذا يدوروا القبقاب هذا يجيبلو شربية ماء حتي حبوه الناس و ولاه يحسنولو و لي يقبض فيهم جوانب و كل يوم علي قسم جديد و تنفنفت أحوالو و الشهرية متع السلطان هذيكة كل شهر يخليها علي جهة ما يجبدهاش
    حسدو سي الدهان قال: هو بني و انا دهنت علاش حطو هو في الحمام وموش أنا و في عوض الي هو قاعد يصور في الميات و الألوف و يكنز علاش موش أنا. لكن هاو نربط هالو طلع للسلطان قال: يا سيدي انت تكرمت علي الرعية و تفضلت عليها و عملت حمام و الغسيل بلاش و ها الراجل الي حطيتو في الحمام راهو يدفع في الناس ، الطياب بقداش و المطهرة بقداش، و الناس ياسيدي راهم قاعدين يتضجرو منو و نزيدك زيادة ، ثمه ناس من هاك المشوشين يقولوا الي هو موش قاعد يعمل فيه من راسو ، الفلوس قاعد يحاسب بيهم في السلطان ، و توه من فم شكون تسمعها السلطان ولي حمامجي
    قال: شنوه؟ ولد الكلب، انا حمامجي؟-
    ولاتروي في النازله لا بحث لا سمع من المتهوم قال: وزير ، هز البناي حطو في شكاره و ارميه في البحر، وبره انت يا دهان اقعد في بقعتو في الحمام
    الوزير جا باش يتكلم خاف علي نفسو ماش يقول لو يا سيدي بالك هالراجل يكذب ، بالك بناتهمش أغراض؟ استخبر و ابحث وحتي يشهدوا لك الناس ؟ لكن شاف السلطان مغشش و شلاغمو تتنمبر و شعرو مفيش سكت...
    عند الاول فرق الحكم، روح الوزير لدارو بعث جاب البناي قال لو: يا ولدي سيدنا راهو آذني باش نبحرك
    علاش يا سيدي قالو آش عملت من عيب ؟
    قالو: نعرف الي انت مظلوم و الدهان حاسدك، و ننجم ما نفذش الحكم لكن علي شرط اقعد عندي هونية في الدار لا تخرج لا توصل للباب لا تطل من شباك حتي آش يعمل ربي علي خاطر اذا كان يشوفك بعض الحد و يخبر السلطان راهو راسي يلعب بين ساقيا ، وانا عملت معاك المليح ما تكافينيش بالدوني
    قالو: يا سيدي الي عملت مبروك ، الوزير عندو بيت في الجنينة ( الجنينة داير بيها سور) حطو فيها ، و طلع للسلطان قال: نفذت الحكم المطاع و ربي يبقي سيدنا
    و سي الدهان مشي تنصب في الحمام، ووقتها ولي غديكة الدفوع بالمنجد ، في عوض الي كانوا الناس لجونتهم يعطيوا الاحسان وواحد يعطي واربعة خمسة ما يعطيوش ولي الحمام بالطريفة و الدفوع بالمسبق

    بره يا زمان ويجي يازمان نهار السلطان ( عندو بابورينو متع نزهة) خرج يتفسح في البحر..هو قاعد علي الكويطره و مدلدل يدو في الماء و تملص الخاتم من صبعو طاح في البحر، خاتم طاح في الغريق مازالشي الواحد يخمم عليه ؟؟ أيا ربي يخلف
    البحرية متاع السلطان في هاك البابورينو يصطادو في الحوت، برزو نهارتها
    كيف روح للسراية و هبطوا هاك الحوت قال: هزوا باي لدار فلان و باي لدار فلان ( منهم باي لدار لوزير) الوزير قاعد في دارو و جابوا كيف ما تقول انت كنسترو بالحوت قالو: هاذية من عند سيدنا، عيط للطباخة قاللها هز هالحوت لكن فبل ما تهز الكنسترو اختار منو حوتة باهية قال لها هزها هاذي لهاك البناي ، مسكين قلو يدبر راسو فيها ، يشوي و الا يعمل كيف ما يحب..
    هزت هاك الحوتة للبناي، حكها في الماء شد قشرها، هو شقها و جبد الفرت متاعها و يلقي في وسطها خاتم خزرلو ثبت فيه مليح يلقاه خاتم السلطان ( خاتم السلطان ما يغباش فيه) السلطان مستانس كل نهار جمعة يجيء للحمام و قبل ما يدخل يغسل يخلي عندو اسطوشو و سلسلة و منقالة و خاتمو رمي الخاتم في مكتوبو و قام مشي للوزير، قالو: سيدي نحبك تقابل بي السلطان
    اشنيه؟ قالو هذا كفويا؟ علي خاطر عصيت امرو و خبيتك و عتقتك من الموت؟ تحبو اليوم يبخر بلحمي؟ هكه؟ اتق شر من أحسنت اليه
    قالو: يا سيدي انت آش عليك؟ كيف يسألك قول الي انت نفذت امرو ورميتني في البحر- و خليني ندبر راسي
    قالو: انخمم، بات الليل لكل النوم ما كحلش عينيه في الصباح قال وين ترسي برة اسلام ، ايا معايا وصلو للسراية خرج السلطان للمحكمة دخل الوزير الدايره، الفركاوات، تصففو علي اليمين و علي اليسار، جا باش حامبة حل الباب علي فردتين و قال: سيدي حاضر يا شكاية و سي البناي داخل هو الاول، قدم و خر عطي كار السلطنة، السلطان غزرلو قال: آه هدا موش البناي؟ وزير موش آذنتك باش تحطو في شكارة و ترميه في البحر؟
    قالو: يا سيدي امرك مطاع و ما نخالفش عليه حطيتو في شكارة و خيطت عليه و زدت ربطت فيها حجره و جيت لغريق البحر ورميتو ما نعرفش كيفاش اليوم هاو حي قدامنا
    قالو: كيفاش يا ولدي؟ احكي لي قصتك، وين كنت؟
    قالو: يا سيدي جبت لك السلام من خوك سلطان البحر
    قال لو: شنوه ؟ هو ثمه سلطان في البحر ؟
    قالو: اي نعم يا سيدي، سيدي الوزير حطني في شكاره و خيط علي وزاد ثقلني بحجره ( الله يجازيه خير) و رماني في البحر غطست، سعدك و المسعودين جيت قد قد قدام السراية متاع سلطان البحر، شدوني العسكر آه هذا براني؟ هذا منين جا؟ دخلوني للسلطان قال لي كيف سبتك؟ حكيت لو قلت لو الي أنا صنعتي بناي و حكيت من الجملة حتي علي الحمام الي بنيت هولك يا خي شد في ما سيب قال لي ابني لي حمام كيف الي بنيتو لسلطان البر و هاذي المدة لكل وانا نبني و ما كمل الحمام الا البارح برك. اليوم علي الفجر قال لي توة ماش نرجعك للبر و سلم علي خويا السلطان وقول لو يعمل مزية يبعث لي الدهان الي دهن لو الحمام متاعو، وهاو الاماره، و عطاني يا سيدي ها الخاتم قال لي ادي هولو
    مد لو الخاتم خزرلو السلطان لقاه خاتمو الي طاح لو البارح في البحر ما عادش ثمة شك في النازله
    قال :عنديش حد، ايا ابعثو جيبوا الدهان بره يا باش حامبه قول للرايس يحضر البابورينو و يستناني و جيبو الدهان مقابله للحرس ، فيسع باش منخليوش خويا سلطان البحر يستني، هو احتاج لي و قصدني ما نعطلوش
    حضرت الكروسة مقابله الحرس طلعوا للبابورينو، الدهان مشي لو باش حامبه جابو زاده للمرسي ركب لكن السلطان ودايرتو ووخينا سي البناي واقف فهم الضربه منين جاتو
    قالو السلطان: يا ولدي طلب عليك سلطان البحر، البناي مشي بني لو حمام ياخي هو بعث لي ، قال يحب نبعثلو الدهان متاعي اماله هاوكه سلم عليه و نحبك تهنيني و تخدم لو خدمة في طريقها، تمشيشي تحشمني معاه؟
    الدهن فهم النازله، و عرف الي صاحبو البناي هو الي ربطهالو( و المسلفه في لغنم مردوده) لكن آش ماش يقول؟ قعد يخمم في حيلة باش يمنع و منها قال لو : حاضر يا سيدي و أمر السلاطين طاعة و كون متهني الهناء التام لكن أنا توة ماشي.. سامحني نمشي نجيب الماعون متاعي ونجي
    قام البناي قال: ماعون؟ هو خصيص في الماعون ؟ الدهن عندو علي كل لون و الشيت من الشيت الكبارمتع التبييض لشيت بو ثلاثه شعرات، القرينزه شيت، الفيليتوات كل شي عندو بالبرشت، لا أنا كيف مشيت نبني لو ماو لقيت الماعون لكل عندو قال السلطان أيا موش لازم بعد اللي هاو قالك كل شيء عتدو، أي الشكارة
    جابو الشكارة قال البناي هات أنا نحطو فيها و نخيط عليه بيدي( انا نعرف كيفاش) و دخلو في الشكاره و خيط عليه خياطتين و ربط فيها حجره و منها قال هدي شوية ثماشي حجرة اخري، ربط حجرتين
    وهزو هو بيدو ورماه في البحر و قال لو ايا بره في الامان و سلم لي علي السلطان و بوس لي يدو ( راهو خيرو في كرشي) و براس خويا ما تحشمنيش معاه


    و ياحافر حفرة السو ما تحفر الا قياسك

     
    جاري تحميل الصفحة...
  2. Dream-Sat المدير العام
    طاقم الإدارة إدارة المنتدى

    الادارة

    رد: حكايات عبد العزيز العروي

    عيشة راجل

    مرحباً أيها الزائر , يجب عليك التسجيل أو الدخول لمشاهدة الرابط!



    :32:

    هاك العام أستاذنا في الصادقية (الله يرحمو) الشيخ سيدي حميده النيفر (بو الشيخ سيدي البشير و الشيخ سيدي ابراهيم) حكي لنا حكاية عيشة راجل
    اشنية عيشة راجل ؟ المرا الي يقولو مسترجلة. النساء ماهم يبداو في الدار و هي ما تقعدش في الدار. كيف هاك الجريديه الي كانت تدور في تونس ( اليوم يجي ثلاثة والا أربعة سنين برك ما عدتش نشوفها يمكن ماتت) كانت تبدا تدور في الشارع لابسه قبقاب وجِبّة و فوطه ( بلا سفساري) تبدا تميل و تستعدل (كانها في الدار) تمشي لديار الأكابر الكل (وهاهي في دار سي فلان، هاهي في دار سي فلتان)
    تعرف كل واحد آشكونو بوه و اشكونو خوه وولد عمّو وولد خالتو ، توقّفو في الشارع تنشدو علي أمّو آش صابت نفسها و مرتو ولدتشي و أختو تحلّش مكتوبها؟ تقعد في القهوة كيف الرجال ، تركب في الطرمفاي بلاش الخلاصة ميكلموهاش و إذا كان واحد جديد ما يعرفهاش و يعيط لها البوليس، البوليس يقولو : عاد هذيكة تخلّص!! هاذي كيف ما كانت عيشة راجل اللي حكي لنا عليها الشيخ، الله يرحمو.
    كيف ما كانت (اليوم يجي ثلاثين سنة) في النفيضة أمك سالمه الهماميه، تبدا قاعده في قهوة (لَلْجِرْيان) هي و الرجال و تحكي و تاخذ كلمة و تعطي كلمة). و كيف شيروبه في جمّال الّي تبدا تدور في الشارع و تقعد في القهوة مع الرجال و تتكلم ياسر(ديمة لسانهاخدّام) حتّي هاك العام واحد عندنا مذيع (في كل نشرة اخبار يعطي هو نشرة الأخبار) ديمة يتكلم. في جمّال سمّاوُه شيروبه

    نرجعوا لعيشة راجل. قلنا النهارالكل وهي في الشارع و من قهوه لقهوه. وكذلك في اليل تسهر في القهوه (هذاية كيف ما نقولو في زمان حمودة باشا) . القهاوي زمانتها يبدا ثمّة الفداوي، يحكي في قصة راس الغول والا في العنتريه. عقاب الليل يقوم يروح، ثمة الي يزيدو يسهروا. كانت هي تسهر في شوكة حمّام الرميمي في قهوة سيدانه ـ
    ليلة من الليالي الفداوي حكي حكايه مرعبة (جنود و أغوال و أهوال و خوف و عفارت) بعد ما مشي علي نفسو قعدوا الجماعة يتفكروا في اللي كان يحكي فيه، و هذا آش يقول و هذا اش يقول و واحد مفجوع و واحد خايف، و واحد قال أنا منخافش،
    قالت أمك عيشة راجل: بربّي اشنوه الّي ثمّة في الدّنيا يخوّف؟ آنا مريتش
    قالولها :عجايب؟ عمرك ما خفت من حاجة انت؟
    قالت: عمري ما خفت من شيء
    هذا صدّق، هذا كذّب حتّي قالو نخاطروها
    . قالت : حاضر باش،اشنوة؟
    بداو يفركسوا علاش ماش يخاطروها؟ حتي قال واحد: الخِربة الليلة بايتين فيها سته
    اشنيه هاذي الخربة؟ كانت زمانتها المشنقه منصوبة في باب سويقة . يشنقو الواحد (قدام الناس) و يخليوه معلق، كيف تعشي لعشية يهبطوه و يحطوه. كنت معصرة قديمة (يمكن تثبت علي زمان الرومان) خاربه ما يعرفوش حتي اشكون مواليها (وين توّة هاك الحوانت متع نجارة الزبّوز) ايا يا سيدي فين قهوة البوسطه
    هاك الخربة مازال فيها باب يحلو الباب يدخلوا هاك المشنوق يردّو عليه الباب يبيتوه ثمّيكة. من غدويكه يجيوا يهزّوه يدفنوه

    عاد واحد قال الليلة ثمّة ستّة بايتين في الخربةـ ستّة تشنقو نهارتها و عند المغرب هبطوهم حطوهم في الخربة (حتي لغدوه ايا (قال لها) تمشي لهم؟
    قالت :نمشي-
    تحل الباب تدخل، تاقف عليهم، و ترجع-
    قالت: إي نعم-
    قالو: تي ماك تكذب، انت تنجّم؟-
    قالت: جربوني-
    قالو: يمكن تحل الباب و تاقف وراه و منها تخرج تجري و تقول: دخلت و وقفت عليهم
    قالت : لا ، ندخل عليهم-
    لكن شنيه الأماره الي انت دخلت عليهم؟-
    قالت: اعطيوني حاجة نحطها بحذاهم-
    قال واحد: ماك ترميها من بعيد و تهرب-
    اماله آش نعملو؟-
    منها واحد طلع بفكرة. قال: انطيبو طنجره حْسُوْ، و تدخل انت بهاك الطنجره في يدك و كل واحد من هاك الموتي تحلّو فمّو وتحطلو مغرفه حسوْ يسخايل صعّب عليها ياسر.( وهاذي شكوه يقدر عليها في هاك الظلمه؟ و واحد مشنوق وموش حتّي ميّت موت ربّي راهي العبابث دايرة بيه، و تقربلو زاده و تحل فمّو و تحطلو مغرفة حسو) هاذي عمرها ما تتصوّر في العقل، لكن هي قالت نمشي
    قالوا: أيا الحسو إماله
    هي دارها قريبة، قالت: استناوني ربع ساعة نحرود طرف حسو ، ياخي شنوه بوه؟ وقامت مشات
    و قعدو هوما : زعمة تخاف؟؟ بالك مشات لدارها ، توة تغم علي راسها و ترقد و تنفّخنا؟ قال واحد: لا قلبها قوي، هاذي عجوزة جهنم لازم تجي
    واحد منهم مكسر ذنايب، واحد بايع براسو ما يعرفش الخوف كيفنهو (دارها شليلة و مليلة) قال : أنا الليله، إلاّ ما نعمل لها عملة تتنسخ في الكتب
    والراجل ( حقيقة راسو صحيح و ما يخافش) قال لهم: أنا ماش نمشي قبلها نقعد في وسط الموتي و وقت الي تجي نقوم لها و نفجعها

    وقام مشي، دز الباب، دخل للخربة، مشي للبيت الي فيها الموتي ممدودين جا في وسطهم و تمد.
    بعد حصة خلطت هي في يدها قفة فيها طنجره بالحسو و مغرفه ايا (قالت لهم) هاني ماشيه كل واحد نحطلو مغرفة حسو في فمو، و غدوه الصباح امشيو قلّبو ، كان لقيتو افامهم فارغين ربحتو وكان كل واحد فمو مليان بالحسو وراس الجاه ما نكمل نهاري الا بتقريطه جديدة علي راسي علي خاطرهم مخاطرينها بتقريطة يشريوهالها وقامت دوقه دوقه ( وهوما في جرتها) من بعيد دزت باب المعصرة دخلت و (فنار) في يدها عطاوهولها خاطر زمانتها لا ثمة ضوء في النهوجات لا شيء و حتي وقت الي تدخل ظلمه ، حتي الموتي متشوفهمش البيت الي يحطو فيه الموتي (وقتها شكون ما يعرفهاش)؟ مشاتلها مقابلة و هي تتكلم وحدها و تِتَّكمِر وينهومه هالعُيّاق؟ وليداتي لو كان ما عملتو راهو ما يجري لكم هكة، لواه موصلين نفسكم؟ حتي رسات لكم بالمشنقه و الشوهه و الفضيحه، يا ربي اللطف
    وجات للولاني، حطت الطنجرة بحذاها و الفنار عند راسو جات باش تحلو فمو لقات سنيه مكززين (هو الميت فمو يتحل؟) قالت: حتي أنا زاده، نسيت الي الميت فمو ما يتحلش، علي كل حال كل واحد نحلو شفايفه و نصبلو مغرفه مكانش التقريطة والله ما نشوفها و عبات مغرفة و صبتهالو و نقلت للثاني، هي طبست عليه و وخينا (ممدود في الوسط) هز راسو وقال لها : وانا؟

    دوات هاك الكلمة هذيكة في ظلام الليل، و معصرة فارغة و دمس الصدي متاعها قوي و اليل سمّاع يسخايلها ماش تتفجع تطيح ما في عينها بلة ياخي لا تفجعت لا شيء اما قالتلو: استني حتي يجيء طريقك!! ما تعرفش تصبر ( اللطف يا ربي) هاهيكه الزربة متاعك وصلتك للمشنقه
    وحطت مغرفه للثاني و للثالث و الرابع و الخامس و السادس و السابع قالت: آه هم قالولي سته تي هاهم سبعة ايا كملت و خرجت، لقات الجماعة واقفين تحت حيط
    كيف شافوها تفجعوـ
    قالت لهم: سبعه راهم موش سته، يا غشاشين-
    كيفاش يا عيشه؟-
    قالت: وراس الجاه سبعه
    سبعه؟-
    ايه سبعه ووحيّد منهم عامل روحو قْبيِّحْ، قالي: وانا؟ قتلو : اصبر حتي يجيء طريقك والله ما عطيتو الا كيف جا طريقو ، لا هو خير منهم؟
    قالولها: صحّة ليك، التقريطه ربحتها، غدوة تكون عندك ، لكن وينو فلان اشبيه ياخي مخرجش؟
    قالت: آما فلان؟-
    قالولها: السابع-
    قالت: بربي تدّككو، ميت مازال ماش يخرجلكم-
    قالو: يندري آش وقعلو هذايه؟ ايا ندخلو نشوفوا-
    دخلوا بفنارهم يلقاوهم سبعه ممدودين و صاحبهم في الوسط العينين محلوله مزَعّزه و الوجه أصفر (وجهو ميت) طبسو عليه مسّوه، لقاوه بارد سكه، ميت كان ماش يفجعها ياخي كيف قال لها: وانا، و قالتلو: اصبر، تفجع هو و شهق شهقه واحده طلعت روحو
     
  3. Dream-Sat المدير العام
    طاقم الإدارة إدارة المنتدى

    الادارة

    رد: حكايات عبد العزيز العروي

    ما فيهمش أمان

    مرحباً أيها الزائر , يجب عليك التسجيل أو الدخول لمشاهدة الرابط!




    رديتوشي بالكم ؟ فين تحكي امرا علي راجل عمل عمله فاسدة تقول: الرجال ما فيهمش أمان، ما يتامنوش و اذا كان تحكي لها علي امرا كيفها خانت راجلها و الا عملت معاه العمايل الي ما تتحكاش عمرها ما تقول النساء ما يتامنوش
    المليح و الدوني في الرجال و النساء ، آما النساء ما يشوفوا الا دوانة الرجال و الرجال زاده ما يشوفوا الا دوانة النساء


    هاك النهار في الدار حكاولنا علي راجل ( مبسوط و في خير كبير) لكن مرتو ما تضناش ، قعدت عندو خمسه و الا سته سنين و ما ظهر عليها شيء
    خافت لا يمشي ياخذ عليها امرا و الا يطلقها و ياخذ غيرها ، و تخرج يدها علي راسها من هاك الرزيق
    طبخت الرّاي هي و أمها اتفقو مع قابله تشوف لهم صغير . بعد بأيام قالت لهم :هاو ثمه واحده حبله و ماذا بيها تسلم في صغيرها
    من نهارتها المرا ولات ( حاشا من يعدي ) تتقيا و خلايقها دايره ووجها اصفار. راجلها :آش بيك يا بنتي ؟ قالت لو: الظاهره وحم
    فرح الراجل و تخلخل و ولي لك يجري و يطيح و النهار لكل و هو وين نحطك يا طبق الورد و هي كل نهار تزيد شوليقه و تكبر في كرشها . الحبله في الرابع ، وهي في الرابع، الحبله في الخامس و هي في الخامس.. كل نهار تزيد حاجه، و الراجل ما في علمو بشيء و ما فاطن بشيء ( و ماعندو حد لا امو ، لا أختو . وحيد لا والي لا تالي ) حتي ولات كرشها كيف التنين قدامها، دخلت في الأشهر الكبار... كيف الاخري الي بالمنجد
    نهار عشية مغارب ، الراجل دخل للدار و منها خرج تفكر قضيه، رجع ما فطنتش بيه مرتو ( البيت الي هو فيها مقابله السقيفه ) يشوف في نسيبو ( خو مرتو ) دز الباب و دخل، فيسع قال لها: المرا ولدت ، اطلع للفرش، و خرج يجري لسقيفه، و قف في الباب... دخل خرج عاود دخل و منها اتدز الباب مرة أخري و دخلت أمها و معاها امرا أخري ( القابله) هازة حاجة تحتها
    أمها من وسط الدار صاحت :يا رسول الله . و دخلو للبيت ... قامت الاخري الصيحه ، فهم الراجل شنيه النازله. نقز للسقيفه و عمل نفسو حل الباب و دخل آش بيكم لاباس؟ خرجت لو العزوزه اقعد اقعد ، ما تدخلش مرتك بالحس ، ايا قام الزغاريط ، آشنوه ؟ قالو: وليد
    دخل باسها من بين عينيها و خرج ماش يقضي ما يلزم
    غاب سويعه من زمان و ما فطنوا بيه الا داخل و معاه زوز بوليسيه و كوميسار و طبيب قلِّب النافسه ، لقاها عمرها ما حبلت و ما ولدت و ما تعرف ها النازله . الصغير تهز للسبيطار و الجمّيعه ( هوما و قابلتهم ) مشاو في السلاسل

    أنا كملت ها الحكايه و المرا قالت: الرجال ما فيهمش آمان
    عجايب بالله، يبدا قد ما عملت المرا الأولي و الثانية و الثالثة ( عاملين عليه كمبي هي و أمها و القابله ) و ما ظهر كان هو مافيهمش آمان؟
    الثلاثه النساء ما فيهمش امان أما هو عارك علي نفسو ، و ما حبش يخليهم يعديوها عليه ، و يدخلو عليه البراني يورثو


    نحكي لكم حكايه . ثمه راجل ( هذي زادة وقعت ها النهارين برك) هاك الراجل مات و خلي امرا و زوز وليدات
    المرا عدات الفروقات و الزياره و سلمت في الوليدات لسلفها ( خو راجلها) و طارت
    مشات لنابل و الا سوسه و الا قابس ( ماعليناش فيها ) تعدي العام الاول ، الثاني، الثالث ، السابع، الثامن ، حط بيها الزمان روحت
    نهار سلفها دخل للدار قالت لو مرتو َمرْة خوك راهي جات قبيله و تسلم عليك، قال آشنيه؟ آش جايه تعمل هونيه؟ ساقها ما عدتش نحبها تحطها في ها الدار . من غدويكه قالت لو راهي جات اليوم زاده . نقول لك الحق حشمت ما نجمتش نطردها، ماهي الا َمرْة خوك علي كل حال . ووليداتها محسوب يتامي تشم عليهم ريحة راجلها . قال لها علي كل حال ما نحبش نشوفها
    ولات المرا تقريب كل نهار تجيء . مره تفطر مره تتعشي ، ليله وخرت قالت لها اقعد بات
    كيف جاء هو قالت لو نقول لك حاجه و ما تتغشششي علي: مرة خوك بايته الليله بحذانا
    تغشش عيّط ( المرا تغلب) سكت لكن ما قابلهاش
    ولات ساعه ساعه تبات ، ولي يقابلها . و لاو يقعدو فرد مايده... ولات بايته صابحه في الدار
    نهار من النهارات المرا مشات ضيفه عند أختها، هزها من الصباح ،العشيه جا يدق عليها في دار أختها مدلها طلقتها من الباب
    آش وقع؟ الراجل رد َمرْة خوه الي ماكانش يحب يسمع بيها حتي بالسمع و طلق مرتو قد ما عملت معاها لمليح و ربات لها اولادها ، ووكلتها و شربتها و ما حبتش تطردها و عاركت عليها و لحلحت. باش كافاتها؟
    طيشتها و صبحت في بيتها. و الأخري خرجت بيدها علي راسها
    آشكون هوني الي ما يتامنش؟ الراجل و الا المرا ؟
    الجمل قالولو: آما خير الصعده و الا الحدره ؟ قال لعنة الله عليهم الاثنين
     
  4. Dream-Sat المدير العام
    طاقم الإدارة إدارة المنتدى

    الادارة

    رد: حكايات عبد العزيز العروي

    عزّ نفسك تصيبها


    مرحباً أيها الزائر , يجب عليك التسجيل أو الدخول لمشاهدة الرابط!






    يحكيو على واحد حطاب مكسبو فرد ولد، كبر طلعو للكتاب و كل صباح يهز فاس و يطلع للغابة، نهار لكل و هو يخدم…يهبط حميّل الحطب للبلاد يبيعو يصرف على عشاه و البقيّة يعطيهم للمدّب.
    يقلّو: يا سيدي المدّب، ولدي راني صدّقتو على القرآن و على العلم.
    و المدّب مغروم بهذاك الولد و مجتهد فيه اكثر من الولاد الاخرين، و الولد حتّى هو موش مخلّي من روحو. حفظ القلم الاول، القلم الثاني، القلم الثّالث… و ولّى يقرّي مع المدّب. ايّا مات بوه، و مديده كمّلت امُّو. ما عندو ما يعمل في هذكا البلاد و لا عندو فيها لا اهل لا مّالي…مشى باع الدّار و بقّى سيدو المدّب بخير و شدّ اثنيّة السّفر. النّهار الكُل و هو يسير، طاح اللّيل، جى تحت شجرة و رقد. في منامو، وقف عليه راجل كبير لحيتو طويلة هابطة كِسْبايك الفضّه على صدرو و لابسْ الكُلّو في الابيض
    قالو: عزّ نفسك تصيبها. اللّيله الثّانية وقف عليه زادا و قالو نفس الكلمة، اللّيلة الثّالثه كيف كيف. ايّا عليه و على بلاد، كرى بيت في فندق، حطْ حْويجاتو، و خرج يدور و يخمّمْ اش باش يخدم. عندو شويّ فلوس الّي باع بها الدّار و يلوّج في خدمة باش يعيش… يتفكّر في الخرايف، الِّي يقول خدم في المرمّه، و الِّي يحمش في النّار في حانوت فطايري و الِّي خدم صانع قهواجي. وقف على امْرمَّهْ و تذكّر هاك الرّاجل الكبير الِّي وقف عليه في المنام الِّي قالو عزّ نفسك تصيبها، زاد على قدّام، ياقف على قهوة يقول نخدم هوني يتذكّر هاك الشّايبْ، زاد القدّام شْويّه، يلقى حانوت فطايري، كيف كيف… قْعدْ ايدور في البلاد و يخمّمْ و يفركسْ.
    هاوْ شاف واحد يسوق في بهيم عليه شواري و اربعة قلال بالماء و منها شاف واحد اخر و واحد اخر… وقف على واحد يسألو
    قالو: باللّه سامحني بربّي هالبلاد شبيها فيها النّقّالة ياسر؟،
    قالّو: ماوْ على خاطر هالبلاد ما فيهاش ماء ، يجيبو الماء من البرّا بالكراء.
    قال هذي هي الخدمة الّي تصلح بيّ. لكن باش يخدمها هو موش متيسّر: عزّ نفسك تصيبها. امشى الى سوق الزّوايل شرى بهيم، بردعة، شواري و قلال و روّح بيهم للفندق،
    قال للفنادقي باللّه فمّاشي شْكون يحبّ يخدم؟
    قالّو: فمّا علاش ما فمّاش… عيّط الواحد يجيوك مائة.
    و خرج دقيقة من الزّمان و رجعلو و جابلو واحد قالّو هاو يحب يخدم… تفاهمو ثلثين بثلث… بايْ للرّاجل و بايْ ليه هو و بايْ للبهيم و شواري و القلال. من غدوة زاد شرى بهيم واحد آخر و واحد آخر… ولّات صاميّه ثلاثه رجال يخدمو و هو قاعد و كل عشيّة يجِو يحاسبوه و هو مستحفظ على رزقو… الماكلة ما حظر و اللِّباس ما ستر. زاد لمْ شويّه فلوس زاد بهيم آخر حتّى ولّاو بعد مدّة ثمانيه ولّا عشره زوايل رجال يخدمو عليهم. بعد مدّة تلمّت عندو الفلوس لقى دلّال يدلّل على دار، مشى قلّبها مع ناس… زاد فيها… شراها و سكن فيها و بدى بشويّه بشويّه يقشقش كلّ مرّة يشري حاجه و يربّي في العش. الدّار الّي بجنبو مولاها توفّى…تحطت للبيع… زاد فيها، شراها و دخّلها و ولّات دار و عليها الكلام. نهار مشى للحمّام لبسْ ل لبسه مهمّمه ( كما نقولو جبّة خمري و كشطه مطروزة) و من حينو دخل للمقصورة…لقى جماعة تجّار قاعدين، سلام عليكم و عليكم السّلام، و جاء قعدْ بحذاهم و معاهم امين التّجار… و هو لا يعرفهم، و هوما لا يّعرْفوه. ما هو مخالط حد في هذِكهْ ا لبلاد. جابو كل واحد طيّاب، هو جاب زُوز طيّابه… قعدو باهتين في هذا الشّاب اش يكون. غسل، خرج، تبرّد في المصورة، وقف قدّام الصّندوق، رمى اللّويز للحمّامجي و جاء خارج
    قالّو:اسْتنّى استنّى يا سيدي نرجّعلك الباقي متاعك… قالُّو: خلِّي عندك باش تلقاهم. وخرج.
    امين التّجار قال: الّي يرمي اللّويز و ما حاجتوش بالبقّية لازم ما يكون ولد ّناس كبار.
    لبس صبّاطو و خرج في جرتّو قالو:
    سامحني يا سيدي نتشرفّو بك و مرحبا بك و زارتنا البركه.
    قالو: انت محل كل بركه
    قالو: تتفضّل بحذايا شويّة في الحانوت نجيبلك قهيوة.
    قالو:الاه يبارك
    وصلو للحانوت قعدو، جابلو قهوة، بداو يتحدثو…
    و ميها قالو: بللّه سامحني سيدي، شكون سيادتك.
    قالو: كان نقلّك شكون سيادتي تو يصير شوشرة في البلاد.
    قال هذا ما يكون كان ولد السّلطان. يا سيدي قالو: شاهي عليك حويجة.
    قالو: شنيّة.
    قالو: تشرّفيني تفطر بحذايا في الدّار.
    قالو: اللّه يبارك.
    قالو: تسامحني تقعد في الحانوت حتّى لين نجيك…
    و خرج امين التّجار و مشى يشري قضيّة باهية و طلب من مرتو باش طيّبلو فطور متاع سلاطين من يديها الملاح… و رجع قعد بحذاه… ايّا عند اللوّل مشاو فطْرو و مبعد الفطور جات القهوة… قعدو يتحدثو
    و منها قالو: يا سيدي باش نعرض عليك حاجة و ما تردّش عليّ
    قالو: شيّه؛
    قالو عندي بنتي عزيزة عليّ و خطبوني فيها ناس كبار و ما حبّيتش نعطيها، نحب نعطيها ليك انتِ…
    قالو: اشبيه مبروكة…
    قالو: كلّ شيء حاضر، جهازها الكل حاضر… و موش لازم تقعدو تستنّاو… قال خلّي نلمّو توّه خير ما يبدّل فكرو… و في الحين حضرت العوّادة و قامت الزغاريد.
    يجْبدها سي الامين جمعة الحانوت امْتاعو ما امْشالهاش بالكل و هو النّهار الكل يعشق في نسيبو و يحمد في ربّي و يجري و يطيح و يقول يعطيني الصّحة
    هاو الوزير مستانس كل يوم يهبط من السّرايا يمشي الى دارو…حانوت امين التّجار في ثنيّتو في السّوق، كل يوم يتعدّى يقعد بحذاه شويّة… نهار، اثنين، ثلاثه… جمعة كل نهار يتعدّى يلقى الحانوت مسكرّة… نشد التّجار قالولو يا سيدي الوزير راهو تقريب جمعة ما جاش… ما تاق صبر مشالو للدّار، دقْ الباب،
    خرجلو: يا سيدي زارتنا البركة، تفضل…
    قالّو الوزير: تنجّم تفسّرلي وينك جمعة كاملة؟
    قالّو: اسكت ماوْ ولد السّلطان ضيف عندي و اعطِتو بنتي،
    قالو: عجائب ولد مولانا السّلطان هوني و انا ما في باليش و ما نضيْفوش، مالا بالايمان اليوما ما يفطر كان عندي في داري…
    هزّو و ضيّفو و عطاه بنتو و قعد سي الوزير ثلاثة ايّام ما خرجش من الدّار..
    الملك، الوزير امتاعو غاب عليه ثلاثة ايّام… بعثلو، جاه…
    قالو: شبيك يا سي الشّباب.
    قالو: ماهو ولد السّلطان عندي و عطيتو البنيّة.
    قالو: عجائب و ما تقلّيش ولد السّلطان بيدو في بلادي و انا ما في علميش به! ايّا اربطو الكرّوسة…
    ربطولو الكرّوسة، خرج، مشالو و هزّو معاه الى السّرايا و ضيفو الضّيافة الّي تليق باولاد السّلاطين و زاد اعطاه بنتو. و ما كفاهش عطاه بنتو و لّا نهار هو يحكم و نهار نسيبو يحكم و سي ولد السّلطان اش يا ذبّانة ما فمّا في الدّنيا كان انا.

    ايّا حبلو الثلاث عرايس و جابو ثملاثة اولاد ولّاو يخرجو يلعبو في الجنينة عاملين واحد بهيم، واحد راكب عليه و لاخر شادد النبوذه. شافتهم بنت الملك
    قالت: اولاد الملوك والسّلاطين ما يلعبوش اللّعب هاذا، يلعب انا ملك، انا سلطان… عند الاوّل كيف جاء راجلها من المحكمة هو دخل للبيت و هي سكْرت عليه
    و قالتلو: توْ تحكيلي اشنيّ حكايتك و الاّ نلويلك راسك… انت ولد مولانا السّلطان؟
    قاللها: انا عمري ما قتلك انا ولد سلطان، انا ولد حطّاب و السّيرة فيها و فيها…
    قالتلو: عليك الامان ماك الّا ابو ولدي.
    الملك بعث جواب للسّلطان قالو ولد سيدنا راهو ضيف عندي و نساه الثّلاثة جابوا وليدات و تهنّى عليه… و كان سيدنا يعمل مزيّة يزيد يخلّيه حذانا شويّة.
    قال السّلطان انا عندي ولد و ما فيباليش بيه؟ جيبولي الوزير، جاء الوزير، يا وزير انا عندي اولاد؟ قالو: ربّي هو الّي يعلم، انت خذيت و طلّقت، بالك واحدة منهم ولدت و انت ما في علمكش به.
    قالو: هاو الملك الفلاني قال الّي ولدي بحذاه و بمرتو وولدو… بالك هذا يكذب؟
    قالو: سيدنا علمي علمك
    قالو: ايّا تعرفشي كيفاش… اركب و برّا الى هذه البلاد و شوف الّي قالك عليه… كانو خليقة مسوّدة و ما هوّاش ولد سلاطين الشّكارة و البحر ما تشاورنيش… و كان لقيتو ولد ملوك و صاحب منطق و يشبهلي جيبو معاك. ايّا ركب الوزير، وصل للبلاد، قبّلوه،
    قاللهم: نحب نقابل ولد السّلطان.
    قابلو بعضهم، لقاه خليقة و مظهر و شباب و ضخامة ، و شوف العجب، ظهرلو يخطف شبية من السّلطان… زاد ولّى هزّو معاه هو و نْساه الثلاثة و اولادهم للسّلطان… فرحوا بيهم… و ولّى السّلطان يحكم نهار و هو يحكم نهار… لين نهار مات السّلطان و ولد الحطّب ضرب عليه الفرد اللّه ينصر من صبح و عز نفسك تصيبها
     
  5. Dream-Sat المدير العام
    طاقم الإدارة إدارة المنتدى

    الادارة

    رد: حكايات عبد العزيز العروي

    الهبال وحلة


    مرحباً أيها الزائر , يجب عليك التسجيل أو الدخول لمشاهدة الرابط!






    اليوم باش نحكيلكم حكاية من سكاندينافيا ما أبعد هاك البلاد على تونس ومع ذلك الحكايات تشبه لبعضها
    يحكيو على واحد خماس, هو يحرث في الهنشير متع عرفو وسكة المحراث وحلت في حاجة.جبد التراب عرى عليها يلقاها وذن قُلَّه.زاد حفر خرج هاك القلة يلقاها مجبسة حلها لقاها مليانة للفم بالللويز (كيما يعطينا ويعطيكم من رزق الحلال الطيب) تفجع بدى يخزر ع اليمين وع اليسار عاود غطاها بالتراب, وقعد يحرث على نفسو.
    حتى عشات العشية و ظلامت الدنيا عاود خرجها ورماها على البغل ورَوَّح لدارو. قبل ما يدخل , حْفَرْلْها تحت الحيط وخباها. ودخل للدار, ناوي ما يقول لحد (طعمو ربي وهذا رزق ماتت امّاليه ,لكن واذا كان يسمعو بيه يفوكوهولو). قال ما نظهرش على نفسي حتى تتعدى مُده, وفيها مدبر حكيم. ..
    لكن مرتو عزيزة عليه, وشريكة عمرو, ما ينجمش يخبي عليها قال لها:
    - يا مرا استغنينا, راني كنت نحرث لقيت قله مليانة باللويز. اسكت ما تقولش توه نزيدو شهرين والا ثلاثة من زمان ونمشيو لبلاد اخرى اللي ما يعرفنا فيها حد.
    المرا ...كيف تقوللها ما تقولش ماو كاينك قلتلها خبر تهبطها في الجرايد وفي الاذاعة ما تخلي حد ما تخبروش, على الصباح دقت على جارتها قالتلها:
    تي ما سمعتش؟؟ مو راجلي لقا كنز في الهنشير متع عرفو. أما وخيتي براس الجاه ما تقول لحد,.
    وقالت للجارة لخرى وللجارة لخرى وكل وحدة تقوللها ما تقولش, وكل وحده تقول .... حتى وصل الخبر لمولى الهنشير, ركب على حصانو وجا للكوخ متع الخماس يلقى المرا:
    - تي كيفاش ها الكنز؟؟
    قالتلو:
    - ماو راجلي هو يحرث لقا قله مليانه باللويز, وخباها وقاللي ما تقولش, بربي انت ما تقولش.
    - مليح وين خباها؟؟؟؟
    - ما نعرفش!!!!!
    مشى على نفسو,في الليل جا الراجل في الليل قالتلو, ماو عرفك كان هوني ونشدني عالكنز ما نجمتش نكذب عليه وقتلو.


    قاللها:
    - ايا اللي عملت مبروك..!!!!!
    تعشى على نفسو ورقدو. الليل الكل وهو يخمم, عالفجر قام, جبد القله ورماها على الكريطة وقاللها أيا قوم..
    قالتلو: لوين؟؟؟
    قاللها : نمشيو نعديو نهار في البلاد. أحنا توا عندنا ولينا غنية ومباسيط ,هيا نهبطوا للبلاد ... علاش ما نروقوش وما نتشخلعوش؟؟؟؟
    ركبو وهبطو للبلاد. خلاها قاعدة في الكريطة وهز هاك القله ومشى حفرلها في بقعه اخرى وردمها بعد ما هز منها كعيبة لويز ورجع لمرتو.
    أيا اداها لمطعم, صرّف هاك اللويزة وقال: جيبولنا توة الفطور أحسن ما عندكم من ماكلة وشراب.
    جابولهم الخيرات السبعة كلات وشربت: هيا نروحو.
    زاد خذا خبزة رماها في المخلى متاعو وركب وركبها وراه في الكريطة وشد الثنية.
    الخطوه متع الكريطه جابتلها النوم, لوات عنكوشها ورقدت, وهو شد هاك الخبزه وبدا يقص فيها طريفات طريفات. رقدت يجي ربع ساعة, ورمى عليها كِسره خبز, فاقت ملعوطه, لقات طرف خبز على وجها, رجعت لنومها, زادها كِسره اخرى فاقت وقالتلو :شنوه هاذا؟؟؟
    قاللها : أرقد أرقد المطر تصب بالخبز. وباقي شادّين الثنيه حتى وصلو للهنشير متع المعلم وتعداو قدام الكوري. يسمعو في بهيم (حاشاكم) ينهق, فاقت قالتلو: شنوه هاذا؟؟؟؟
    قاللها: أنا ما حبيتش نحكيلك, من هاك النهار, أما هاك فطنت بالنازله, عرفي ماهو تسلف فلوس من عند الشيطان كيف جا الميجال ما خلصوش قعد الشيطان كل ليله يجي يبدى يضرب فيه وهو يصيح, هاك تسمع في الصياح متاعو.
    وهي مكوخره بالنوم والشراب ما فرزتشي بين نهيق الحمار وصياح بنادم.
    أيا وصلو للدار, قاللها: أيا أدخل فيسع وتخبى في الداموس.
    قالتلو: آش ثمه؟؟؟
    قاللها: مللي أحنا في البلاد سمعت وما حبيتش نخوفك ,قلت حتى نوصلو للدار ونحكيلك, عسكر العدو باش يغورو على البلاد. تخبى انت وسكر الباب مليح, وخليني أنا أتو نهز المكحلة ونطلع للسطح وان شاءالله ربي ينصرني عليهم.
    دخلت هي تخبات وغمت على راسها ورقدت.
    وقعد هو البرا, مره يشد المكحلة ويضرب وجه, ومره يرمي حجرة عالسطح, والليل الكل وهو عامل هرجة وقيامه قايمه.
    الفجر دق عليها وقاللها : أيا حل. أفرح قتلت منهم يجي ميتين ولقاو النازله ما فيهاش فايده وهزو الموتى متعهم وهربو ونجينا ونجينا البلاد.
    قالتلو: حتى انا الليل الكل وانا ما بين نومين نسمع في قعقة السلاح.
    طلع النهار, خلط المعلم راكب على حصانو قال: قبل كل شي, وينو الكنز؟
    - أما كنز؟؟؟
    - اللي لقيتو مردوم في الهنشير!!!
    - انا؟؟؟؟؟!!!
    - ايه نعم انت ماله انا!!!!
    - انا ما في علميش!!!
    - هاو مرتك... ايجا لهوني


    قالت اللي انت لقيت قله مليانه باللويز.
    - عمري ما سمعت بها الهدره, تراه قوللها وقتاش لقيتها القله؟؟؟؟
    قاللها: وقتاش؟؟
    قالتلو: كيف اليوم لقى الكنز مالغدوه صبت المطر بالخبز.
    - آشنيه؟ آما خبز هذا وقتاش؟
    - ماو ليلة اللي جيش العدو غار عالبلاد وتنصرنا عليه.
    - آشنوه هالهبال؟ وقتاش جيش العدو غار على البلاد؟
    - عجايب!!! موش ليلة اللي الشيطان يضرب فيك وانت تنهق كيف البهيم!!!!
    قال: وووووه عليا ووووه!!!!!
    قاللو الخماس: عاد انت يا عرفي تاخذ عليها؟؟ ما في علمكش اللي ناقصه عقل؟؟؟
    مشى الراجل على روحو....
    وهو زاد شهير ولاّ شهيرين وهز شلاّقاتو وملاّقاتو وركب مرتو في الكريطه وشدو الثنيه. ومشاو لبلاد ما يعرفهم فيها حد. وبدا يصرف ويشري في الديار والحوانت وولاّ شاهبندر التجار
    ....
     
  6. Dream-Sat المدير العام
    طاقم الإدارة إدارة المنتدى

    الادارة

    رد: حكايات عبد العزيز العروي

    تلقى عملك

    مرحباً أيها الزائر , يجب عليك التسجيل أو الدخول لمشاهدة الرابط!





    :32:


    يحكيو علي واحد جنّان يخدم في الجنينه متاع السلطان، نهار ( الحال شتاء) يلقي شجره متع خوخ فيها خوخه، غله من غير وقت، في كبر كعبة البرقدان خد بخد سبحان الخلاّق فيما يخلق٠٠٠
    السلطان يدولش في الجنينه و يتفرج، مشي لو يجري قالو: يا سيدي ايجي شوف ها الخلقه، مشي معاه السلطان تفرج في ها الخوخه العجيبه، قالو: رد بالك عليها، وكيف تطيب قصها و جيبهالي ( هي مزالت خضراء تحبلها كيف مانقولو جمعه باشتطيب) ، سي الجنان مشي يجري جاب حصيره ، فرشها تحت الشجره و قعد ثميكه يعس
    ليل مع نهار و هو ثميكه شادد العسه، و عينو ما تتنحاش من هاك كعبة الخوخ (لا معبود الا الله ) حتي عشاه و فطورو يجيبوهم لو لثميكه
    علاش موش نهار يجي نسر يحط علي هاك الشجره، و يكسر الأفراع متاعها و يفسد كعبة الخوخ يغفصها
    مشي الجنان يجري للسلطان، يا سيدي راهو ها ماصار و ها ماصار
    قاممعاه السلطان مشي للجنينه شاف الشجره كيفاش مكسره، قالو : يلقي عملو. قعدالجنان حاير في أمرو، اشنوه نسر يجي يكسر شجره ، يلقي عملو. ياخي هو بنادمباش يلقي عملو ....؟
    قعد يضحك علي السلطان : الله الله. نسر يلقي عملو، و هذا سلطان سلاطين آخرالزمان٠٠٠

    اياتعدات مده و هو باقي يخدم في هاك الجنينه، نهار يسمع في حس و تصرفيق جايجري، يلقي هاك النسر فوق شجره، و حنش كبير اكحل متمكن بيه يبلع فيه ( والآخر يصرفق في جوانحو و يفركس باش يمنع) و الآخر يبلع فيه بالشويهبالشويه، حتي زرطو الكل و تسرسب هاك الحنش مع الشجره حتي للقاعه و مشي
    تعجب هاك الجنان، و مشي يجري للسلطان حكي لو بالقصه .... قالو يا سيدي الحنش بلع النسر و كلاه
    قالو : يلقي عملو
    اشنوهها الكمنطرو هذايه، نسر يلقي عملو؟ حنش يلقي عملو؟ ياخي شنية صنعتوالحنش ؟ما هو يبدا يصطاد. فين يلقي هايشه الي يقدر عليها يترمي عليها و يبلعهاياخي حتي في هذي يلقي عملو ؟
    زاد السلطان نقص في نظرو٠٠٠


    اياتعدات أيام، مشات النازله من بالو، نهار هو يخدم شادد المسحه و يعزق وضربه من الضربات تجي في اللحم ... جا يشوف يلقي نفسو : هاك الضربه جات فيالغار متاع الحنش ، و الحنش تقص راسو راس حنش من هاك القادرين، بشعرو ،يفجع
    رماه في مخله و مشي اداه للسلطان. قالو: اشكون قتلو هذايه؟
    قالو : يا سيدي هذا هو الي كلا النسر، أنا نخدم و ضربتو بالمسحه قصيتلو راسو ، قالو: تلقي عملك
    اشنيه؟ توي و ليت أنا ماش نلقي عملي؟ علي حنش قتلتو؟ حنش الي هو عدو بنادم؟ اياالسلطان خرف مرّة وحده الله الله. بلاد يحكم فيها سلطان فالت لو ، لا لامشات أمورنا مليح٠٠٠


    قعد أيام و فين يتفكر كلام السلطان يقوم يضحك، بعد مده مشات النازله من بالو
    علاش موش نهارمَرْت السلطان ماش تجي تتفسح في الجنينه هي و بناتها ، جا باش حامبه نبه علي باش جنان ، خرج الجنانه الكل
    هاك الجنان يخدم في بقعه مدغوره، ما سمعش و ما فطن بحتي شي و نساوه
    هويخدم ، و يسمع في نساء تتكلم، و لعب و ضحك و جري ،عرف الي الحريم جا ، وين ماش يمشي و ين ماش يتخبي وين ماش يهرب، بحذاه شجره عاليه تشعبط فيها وطلع تخبي في أغصانها
    سعدك و المسعودين هاك الشجره جات تحت الجابيه قد قد٠٠٠
    و الجماعة قاصدين الجابيه٠٠٠
    دوب ما وصلولها قالو نعُوموا ، ما كانوش من العاكسين طاحوا ينحيو في حوايجهم الي تنزع تنقز تجي في الماء


    وعوم و تشلبيق وبخّان بالماء و عياط و صياح ، ياخي واحده منهم شافت خيال فيالماء هزت راسها تشوف في سيد العين في الشجره يتفرج و ريقتو سايله ، مافاتو شي كانو في الصف الأول في التياترو٠٠٠




    قامت الصيحه، جاو لعساكر يجريوا، اش ثمة ياِ لله ؟ لا باس ؟ قالت لهم :شوفو هاك الكلب بن الكلب الي مخبي في الشجره يتفرج فينا

    هبطوه، عطاوه طريحة نباش القبور، و هزوه (وينو مشطك يا عروس) رماوه في الحبس

    هاوكه في الليل السلطان حكات لو مرتو ، علي الصباح مشي للمحكمه ، الحكم الأول قال : هزوا هاك الجنان اشنقوه

    مشات الطامه و العامه، لبسوه القشابيه عملولو ما يلزم للعرايس ( للمشانيق) هزوه للمشنقه

    ماوا العاده الي ماش يقتلوه يشهيوه، قالولو : تشتهي حاجه ؟ قال نحب توقفوني قدام السلطان نقولو كلمه و حده

    اداووه للسلطان و قف قدامو قالو : يا سيدي، حكمت علي بالمشنقه ؟ قالو : ايه ، قالو : تلقي عملك.

    اشنيه.. اشنوه ها الكلام ؟

    قالو : النسر كسر الخوخه قلت يلقي عملو ، كلاه الحنش ، قلت يلقي عملو ، قتلتانا الحنش قلت لي : تلقي عملك ، توه حكمت علي بالموت ، تلقي عملك

    قال : سيبوه ، أيا اذهب من قدامي
     
جاري تحميل الصفحة...